Төхтүр дьаамын 160 сыла үөрүүлээхтик бэлиэтэннэ! С огоньком отметили юбилей Техтюрской ямщицкой станции!

9 апреля 2022 года в с. Техтюр Хангаласского улуса отметили 160-летие образования ямщицкой станции Техтюр!

Вашему вниманию информация, фото и видео с сайта ЦКР «Эркээни» им. А. Борисова Техтюрского наслега и фото нашего земляка Петра Шепелева в социальной сети «В контакте».

Төхтүр дьаамын 160 сыла.
Муус устар 9 күнүгэр Төхтүр нэһилиэгэр бэлиэ тэрээһин буолан ааста. 1862 сыллаахха Иркутскай-Дьокуускай дьаам суолугар Хаксык нэһилиэгин сиригэр Төхтүргэ Табаҕаттан Козловтавр, Лобановтар, Соколовтар уонна Шепелевтар диэн дьаамсыыктар дьиэ-кэргэттэринээн көһөрүллэн кэлбиттэрэ. Ол кэмтэн ыла силис тардан, кэҥээн, билигин кинилэр сыдьааннара Төхтүргэ элбэхтэр. Бөдөҥсүтүү сылларыгар 3-с Маалтааныттан, Хаксыктан, Кыһыл сулустан үс колхоз дьоно көһөн кэлбиттэрэ,биир улахан колхоз буолбуттара. Онтон ыла икки норуот сомоҕолоһон, биир ыал курдук 160 сыл олорон кэллилэр.
Сааскы ылааҥы күн дьаам часовнятын таһыгар дьон-сэргэ тоҕуоруһа муһунна,түөлбэлэр харчевкаларын аһа тардылынна,хормуоска тыаһа дьиэрэйдэ, нуучалыы-сахалыы частушка чоргуйда. “Дьүөгэ” түмсүү далбар хотуттара ыалдьыттары нууча каравайынан күндүлээн көрүстүлэр. Алексей Алксеевич Черноградскай сыарҕалаах атынан дьаам дьааһыгар тиэйэн аҕалбыт суругун ааҕан, баһылык Багдарыын Кэскил Ньургун уола бэлиэ тэрээһини арыйда. «Дьаам оонньууларыгар» түөрт нэһилиэк хамаандалара илин-кэлин түһүстүлэр. Былыргы оонньуулары: “Петушиные бои”,чехарда, «Былаах былдьаһыы» оонньоотулар, «Дьаам сүүрдүүтүн» эстафетатыгар күрэхтэстилэр. Түмүккэ- Үөһэ Бэстээх хамаандата бастаан, Козловтар дьиэ-кэргэттэрэ туруобут бириистэрин ыллылар. Бу күрэххэ спонсордарынан дьаамсыктар сыдьааннара: Шепелевтар, Козловтар, Алексеевтар уонна Ивановтар дьиэ-кэргэттэрэ буоллулар.
Киэһэ өттүгэр култуура-спорт комплексыгар Табаҕаттан «Соцсветие», «Зоренька» фольклорнай коллективтар (салайааччы Татьяна Бомбина), Дьэр нэһилиэгиттэн «Дьүрүһүй” түмсүү (салайааччы-култуура бэтэрээнэ Татьяна Слепцова), Үөһэ Бэстээхтэн частушкаһыт Зинаида Петровна Добрянцева, гармонист Николай Александрович Наумов, Төхтүртэн частушкаһыт Наталья Константиновна Михеева, Виталий Джонович Наумов, “Дьүөгэ” түмсуу (салайааччы Марианна Сысоева), “Кэрэ эйгэ” — эдэр ырыаһыттар коллективтара,»Кэнчээри» оҕо-садын,оскуола оҕолоро кыттыылаах улахан кэнсиэр буолла. Улуус баһылыгын Бочуотунай грамотатын дьаам култууратын тарҕатааччы Наталья Михееваҕа, Виталий Наумовка, Дмитрий Козловка нэһилиэк баһылыга туттартаата. Култуура киинин махтал суруктарын уонна юбилейнай статуеткаларын кэлбит ыалдьыттар уонна күрэҕи тэрийсибит дьаам сыдьааннара ыллылар. Кэнсиэри көрө кэлбит дьону «Дьүөгэ”, “Айыллаана”,”Талба”, “Көмүс сүүтүк” астаабыт минньигэс бөрүөктэринэн күндүлээтилэр. Кэлбит ыалдьыттар махтал тылларын эттилэр, Табаҕа бөһүөлэгин “Кедр” култуура киинин дириэктэрэ, СӨ култууратын туйгуна Светлана Иванова баһылыкка эҕэрдэ суругун туттарда. Түмүккэ мустубут дьон өйдөбүнньүк хаартыскаҕа түһэн, үөрэн-көтөн, астынан тарҕастылар.