Ушницкайдар саҥа дьиэлэригэр күөх төлөн холбонно

«Хаҥалас» хаһыат сайтыгар үөрүүлээх сонун таҕыста!

Ушницкайдар саҥа дьиэлэригэр күөх төлөн холбонно

Хаҥалас улууһун Төхтүр сэлиэнньэтин олохтооҕо, элбэх оҕолоох аҥаардас аҕа Николай Ушницкай кыараҕас, тымныы, сопхуос саҕанааҕы кыбартыыраҕа олорорун туһунан былырыын ахсынньыга «Саха» НКИХ биэрии устан таһаарбытын өрөспүүбүлүкэ үгүс олохтоохторо көрбүттэрэ “Хаҥалас” хаһыакка эмиэ суруйбуттара.

Тутатына, биирдиилээн дьон, көмө оҥорон саҕалаабыттара. Ол кэмтэн сыл кэриҥэ бу дьиэ кэргэни кытта ыкса үлэ ыытылынна. Улууспут баһылыга Олег Иринеев дьаһалынан оройуон Сэбиэтин дьокутааттара Александр Тимофеев уонна Николай Константинов миэстэтигэр кэлэннэр олохтоох баһылыгы уонна дьокутааттары кытта көрсөн мунньахтаан, бу ыалга хайдах-туох көмө оҥоһуллуон сөбүн сүбэлэһэммит үлэлиир хамыыһыйа тэрийэн үлэ саҕаламмыта. Ушницкайдарга анал счет арыйан, онно көмөлтө аахсыйа ыытаммыт ыҥырыыбыт бүтүн өрөспүүбүлүкэҕэ тарҕаммыта. Ыам ыйыгар нэһилиэккэ киэҥ бырагыраамалаах аһымал кэнсиэр, дьаарбаҥка, атыы-эргиэн былаан быһыытынан олус көхтөөхтүк ыытыллыбыта.

Ыал аҕата Николай Афанасьевич Нам улууһуттан төрүттээх буолан биһиги аны намнары кытта үлэни тэрийбиппит. Нам улууһугар олорор Төхтүртэн төрүттээх Ньургуйаана Романоваҕа тахсаммыт, кини быһа улууһун баһылыгын кытта кэпсэтэн үлэлэстэ. Ол түмүгэр биир дойдулаахтара эмиэ көмө аахсыйа оҥорон көмөлөстүлэр.

Элбэх улахан үлэни дьокутааттар Николай Константинов уонна Александр Тимофеев ыыппыттара. Кинилэр улуус мунньаҕар күүскэ туруорсаннар, харчынан көмө оҥороннор оҕолор баҕарбыт саҥа дьиэлэригэр киирэр ыра санаалара туолар буолбута. Ол курдук, быйыл сайын чааһынай дьиэ тутааччылар көмөлөрүнэн саҥа дьиэ дьэндэйдэ уонна бу күннэргэ сылытар ситим тардыллан күөх төлөн холбонно. Амарах, үтүө санаалаах дьон-сэргэ бииргэ сомоҕолоһон Ушницкайдар дьиэ кэргэн дьиэлэнэллэрин туһугар улахан үлэ кыалынна.

Мотрена ЕФРЕМОВА, Төхтүр нэһилиэгин бэтэрээннэрин сэбиэтин бэрэссэдээтэлэ

«Хаҥалас» хаһыат сайтыгар: https://xn--80aaaaaqpp6as1cq2a.xn--p1ai/article/81527

Аһымал акция этэҥҥэ түмүктэммитинэн 9 оҕолоох Ушницкайдар дьиэ кэргэттэригэр, кинилэргэ көмө оҥорбут дьоннорго уонна тэрилтэлэргэ, чуолаан Хаҥалас уонна Нам улуустарын, Төхтүр нэһилиэгин депутаттарыгар уонна дьаһалталарыгар итии истиҥ эҕэрдэ!!!