Айталина Васильева: "Оҕолору сайдыыга, үлэҕэ көҕүлүүр өйөбүлбүтүн улаатыннаран иһиэхпит"

«Хаҥалас» хаһыат сайтыгар муус устар 30 к. тахсыбыт ыстатыйа.

1-кы Малдьаҕар нэһилиэгин баһылыга Айталина Васильева аныгы кэмҥэ оҕолор төрөөбүт нэһилиэктэрин сайдыытыгар кыттыһалларыгар, бэйэ дьыалатын тэринэн үп-харчы оҥосто үөрэнэллэригэр көҕүлээн сыл аайы оскуола үөрэнээччилэригэр грант олохтуур. Баһылык гранын ылар туһугар оскуола үөрэнээччилэр араас сонун идеялаах бырайыактары толкуйдаан анал хамыыһыйаҕа көмүскүүллэр.

Быйылгы бырайыактар күрэхтэрэ үс хайысханан ыытылынна: социальнай суолталаах, урбааҥҥа уонна тыа хаһаайыстыбатыгар сыһыаннаах. Уопсайа 16 бырайыак киирдэ. Куонкурус хайдах-туох ааспытын баһылык Айталина Васильева сырдатта:

— Бу маннык куонкурус оҕолорбутун үөрэтэр-сайыннарар, өйүүр соруктаах тэриллэр. Кыттыбыт оҕолор бары олус үчүгэй, интэриэһинэй, сонун бырайыактаахтар. Холобура, смузи, фиточай, борщ, тума оҥорооһуна, сайынын субан сүөһүнү иитэн идэһэ оҥостуу, куукула, ключница оҥоруу, оскуола тиэргэнигэр сынньалаҥ сирин тутуу, волонтерскай хамсааһыны, дьиэ кэргэнинэн саахымат, теннис күрэҕин тэрийии уо.д.а.

Бырайыактары экспертиир хамыыһыйаҕа бэйэм, Андрей Архипов, Тыа хаһаайыстыбатын Департаменын начаалынньыга, Наталья Шадрина, Оҕону эбии үөрэхтээһинин киинин кылаабынай испэсэлииһэ, Татьяна Рыгунова, 1-кы Малдьаҕар нэһилиэгин дьокутааттарын Сэбиэтин бэрэссэдээтэлин солбуйааччы үлэлээтибит. Ыҥырыылаах ыалдьыттарбыт бэйэлэрэ эмиэ оҕолорго араас туһалаах сүбэ-ама биэрдилэр.

Быйылгы грант сууммата 150 тыһ. солкуобай этэ, онуоха эбии 50 тыһ.солкуобайы бырайыактары сыаналааһыҥҥа Москва куораттан быһа холбонон үлэлэспит инвесторбыт, «Одун-Хаан» ХЭТ ТК салайааччыта Евгений Кулешов анаата. Онон, түмүккэ 8 кыайыылааҕы быһаардыбыт, кинилэргэ Туоһу суруктары үөрүүлээх быһыыга-майгыга Өрөспүүбүлүкэ күнүгэр туттардыбыт.

Ол курдук, «Бизнес-бырайыак» номинацияҕа кыайыылааҕынан «Мастерская сестер «MyHobby» Люба Бурнашева, 10 кылаас үөрэнээччитэ уонна Уйгулаана Алексеева, 6 кылаас үөрэнээччитин (салайааччы Ольга Алексеева) бырайыактара буолла. Кинилэргэ оверлок уонна иистэнэр массыына ылалларыгар 35 тыһ. солк. көрдүбүт.

«Тыа хаһаайыстыбата» номинацияҕа «Субан сүөһүнү иитии» диэн 6 кылаас үөрэнээччитэ Спиридон Моисеев (сал. Евдокия Моисеева) бырайыага бастаата. Киниэхэ сүөһү ыларыгар 45 тыһ. солк. биэрдибит. Ону таһынан ТХД начаалынньыга Андрей Архипов ынах сүөһү комбикормугар уонна үүтү солбуйар бороһуокка сертификат туттарда.

Социальнай суолталаах хайысхаҕа кыайыылаах 10 кылаас үөрэнээччилэрин (сал. Виктория Егорова) «Оскуола тиэргэнин ландшафтнай дизайна» диэн бырайыактара буолла.

Оҕолор баҕа санааларын олоххо киллэрэллэригэр 30 тыһ.солкуобайы анаатыбыт. Маныаха С.П.Ефремов аат. Булгунньахтаах орто оскуолатын үбүлүөйдээх выпускниктара эмиэ кыттыһыахтарын сөп.

Эбии 5 тыһ. солкуобай граны мастан ключница оҥорор былааннаах 3 кылаас үөрэнээччитигэр Эрчим Михайловка (сал. Надежда Кононова), 15 тыһ. солкуобайы 9 кылаас үөрэнээччилэрэ Айта Тобохова уонна Айхал Федоров (сал. Серафима Уварова) «Оҕуруот аһын хатарыы» бырайыактарын иһин уонна 20 тыһ. солкуобайы 6 кылаас үөрэнээччитэ Тимур Сокорутов «Булгунньахтаах сэлиэнньэтин историко-култуурунай эбийиэктэрин туһунан QR-кодтаах цифровой блок оҥоруу» бырайыагар анаатыбыт.

Ону сэргэ, «Одун-Хаан» ХЭТ ТК салайааччыта Евгений Кулешов 35 тыһ. солк. гранын 5 кылаас үөрэнээччилэрэ Рита Софронеева, Уруйдаана Алексеева, Коля Константинов (сал. Наталья Федорова) «Сата кэскилэ» оҕо былаһааккатын тупсарыы» диэн уонна Тойон Арыы оскуолатын үөрэнээччилэрин «Фиточай оҥоруу» бырайыактарын иһин туттардыбыт.

11 тыһ. солкуобай уонна Нэһилиэк дьокутааттарын Мунньаҕын анал бирииһэ 5-с уонна 7-с кылаастар үөрэнээччилэрин (сал. Анна Ховрова) «Үтүө санаа — көтөр кынатым» бырайыактарыгар ананна. Ону таһынан «Ытык киһи олоҕун суола» диэн бырайыак киэн туттар биир дойдулаахпыт, суруйааччы Степан Ефремовка анаммыт экспедиция олоххо киирэригэр 1-кы Малдьаҕар нэһилиэгин бүддьүөтүттэн 100 литр уматык көрөргө быһаарынныбыт.

Бу курдук оҕолору сайдыыга, үлэҕэ көҕүлүүр өйөбүлбүтүн сылтан сыл улаатыннаран инникитин да тэрийиэхпит диэн былаанныыбыт, — диэтэ эдэр баһылык Айталина Ивановна.

Бэлиэтээн эттэххэ, Айталина Ивановна улууспутугар сайыҥҥы сынньалаҥҥа оҕолорго анаан лааҕыр тэрийэн үлэлэтэр, арааһа, соҕотох баһылык буолуохтаах. Ааспыт сайын кини «Лидер оскуолата» диэн ааттаах уон хонуктаах лааҕыра ситиһиилээхтик үлэлээбитэ, оскуола оҕолоро дьон иннигэр саҥара, тыл этэ үөрэммиттэрэ, социальнай бырайыактааһыҥҥа билиилэрин хаҥаппыттара. Ол туһунан хаһыаппытыгар сырдатан турабыт. Дьэ маннык кэнчээри ыччаппыт сайдарын туһугар дьиэ кэргэн, оскуола, нэһилиэк дьаһалтата бары биир санаанан салайтаран үлэлииллэрэ барыбытыгар да үтүө холобур буолар. Сонун тэрээһин үтүө түмүктэрдээх уонна батыһааччылардаах буоллун!

Ольга Гермогенова

«Хаҥалас» хаһыат сайтыттан: https://ханаласгазета.рф/article/96252