Саха омук кэскилин түстээбит тумус киһибит

СӨ бастакы Бэрэсидиэнэ Михаил Ефимович Николаев күн сириттэн туораабыта сыл буолан ааста. Үрдүк чыпчаалы киһи учугастан көрбөтүн курдук биһиги Бастакы бэрэсидиэммит оруола, кини баҕа санаалара кэм-кэрдиис аастаҕын аайы быдан чуолкайдык көстөн иһэллэр.

Мин Михаил Ефимовичтыын 1991 сылтан бииргэ үлэлэһэри саҕалаабытым. Японияҕа, Хаҥаласка, тас сибээскэ уонна бааҥҥа үлэлии сылдьан алтыһар этим.

Уонна 2020 сылга кини ыҥырыытынан СӨ Государственнай Сүбэһитин быһыытынан үлэлиир аппаратыгар киирэн, Бастакы Бирисидиэн тиһэх күнүгэр дылы референынан, көмөлөһөөччүннэн үлэлэспитим.

Онон Бастакы Бэрэсидиэн этиилэрин, кини интэриэһиргээбит ыйытыыларын, ыыппыт мунньахтарын, кэпсэтиилэрбитигэр эппит тылларын наар саныыбын.

Онон биир дойдулаахтарбын кытары Бастакы Президент сорох толкуйдарын үллэстэбин:

Бастакыннан, Михаил Ефимович саха омуга Улуу Арассыыйа састаабыгар киирбитэ түөрт үйэ буолбутунан сибээстээн, саха омук Улуу Арассыыйаны кытары ситимин быспакка, нуучча тылын, нуучча культуратын баһылаан сайдыылаах омук буоларын наар туруорсара.

Иккиһинэн, саха омук Аан дойду цивилизациятын ситиһиилэрин баһылаан, саха дьоно сайдыылаах омуктары кытары тэҥ таһымнаах буолалларын туруорсара. Онон кини эдэр ыччаты омук сиригэр ыытан үөрэтэри, эдэр ыччат омук сиригэр сылдьарын, эдэр ыччат омук тылларын баһылыырын булгуччу диэн туруорсара.

Үсүһүнэн, Саха Сирэ уонна бүттүүн Арассыыйа Арҕаа омук сирдэринэн эрэ буолбакка Илиҥҥи вектор, Азия омуктарын диэкки чугаһыырын наар сүбэлиирэ. Улуу Кытай цивилизациятын түстээбит Конфуций философиятын туһунан кинигэ таһаарбыта.

Төрдүһүнэн, Михаил Ефимович күннээҕиннэн, быстах санааннан буолбакка, омук кэскилин толкуйдуурга планетарнай масштабтаах, кэнэҕэски көлүөнэлэри саныыр толкуйдаах этэ. Аан дойду Нобелевскай премия лауреаттарын кытта атах тэпсэн олорон тэҥҥэ алтыһара.

Бэсиһинэн, Саха Сирэ, Саха сирин олохтоохторо биир тимир суол, уонна биир өрүстэн тутулуктаахтарыттан олус диэн долгуйара. Онон мээнэҕэ дуо, үйэ кэрдииһигэр Хачыкааттар Амыр өрүс кытылыгар бааһыналаммыттарын олус диэн сэргээбитэ. Хас биирдии ыал уһаайбаланарын уонна бэйэтин уһаайбатыгар дьиэ кэргэн экэниэмикэтинэн ас-үөл үүннэрэрин туруорсара.

Алтыһынан, тыа сирэ сайдарын, тыа сирин дьоно орто байылыат буолалларын, о.а. дохуоттара — хамнастара өрөспүүбүлүкэ орто таһымыттан икки бүк буоларын булгуччу туруорсара.

Сэттиһинэн, саха дьоно саха буолалларынан киэн тутталларын, саха культуратын, саха тылын саҥа үйэ ирдэбиллэригэр сөп түбэһиннэрэн сайыннаралларын олус диэн баҕарара.

Онон, биһиэхэ, саха омукка уонна Саха Сирин бары олохтоохторугар, үйэлэргэ салҕанар сирдьиппит, омукпут сайдар суолтан туораабатын бигэргэтэр улуу киһибит Михаил Ефимович Николаев идеяларыттан халбарыйымыахха, кини этиилэрин олоххо киллэриэххэ диэн ыҥырабын!

Н.А.Барамыгин,

М.Е.Николаев аппаратын 2020-2023 сс. референа,

СӨ Общественнай Палататын чилиэнэ,

Хаҥалас улууһун Төхтүр нэһилиэгин бочуоттаах олохтооҕо.

М.Е.Николаев 2022 с. Эркээни Ыһыаҕар этиитэ.