Наталья Скрябина “Арыллыбыт аартыгынан» дьоро күнүгэр

«Хаҥалас» («Хангалас») хаһыат, 2025 с. алтынньы 18 к.

“Иһирэх түмсүү” литературнай-музыкальнай көстүүнэйэ бээтинсэ күн 50 сыл үлэ ыстаастаммыт, онтон 36 сылын Оҕо бибилэтиэкэтигэр анаабыт Наталья Скрябинаны чиэстээн-бочуоттаан ааста.

Быйыл улуустааҕы бибилэтиэкэбит үбүлүөйдээх бэтэрээннэрин айхаллыыр хас даҕаны тэрээһини ыытан кэллэ. Ол курдук, бастатан туран, өр сыл бу тэрилтэҕэ үлэлээбит үтүөкэннээх дьоннорун Марфа Пермякованы, Мария Стручкованы, Галина Ильинаны, Галина Макарованы о.д.а. истиҥник бэлиэтээтэ. Бары даҕаны талбыт курдук хара ньуура суох бүгүрү үлэһиттэр, улахан общественниктар, улууспутугар билиини-көрүүнү тарҕатыспыт, талба талааннаах, общественник дьоһун дьон буоллахтара. Наталья Скрябина олортон биирдэстэрэ.

Айар биэчэрэ, биллэн турар, табылынна, олус иһирэхтик ааста, алтыһан ааспыт дьоно, кылааһынньыктара, кэллиэгэлэрэ, дьүөгэлэрэ үгүс үтүө тыллары арыллыбыт аартыктаах киһилэригэр анаатылар, оҕо, эдэр сааһын, үгүс өрүттээх общественнай үлэтин ахтан аастылар. Бука, Наталья Филипповнаны биһиги улууска билбэт киһи да суох буолуо. Биир бэйэм эмиэ 50-тан тахса сыл алтыһан кэллэҕим, комсомолга үлэ саҕаттан, саныахха астык. Хайдахтаах курдук уоттаах-төлөннөөх комсомол лидерэ этэй, бу Күөрдэм боростуой кыыһа!

Наталья аҕыс оҕолоох ыал улахан кыыһа буоларын билэрим, аҕата кыладыапсыктаан, колхозка, совхозка үлэлээн ыччаттарын ииппитин, кырдьыгы туруулаһарга, сырдыкка талаһарга, киһи киһитэ буоларга. Бука, олоххо ураты көрүүлээх, төрөппүттэрин курдук сиэрдээҕи өрө тутар буолан Наташа партия ыйыытынан тук курдук сылдьыыны ардыгар сөпсөспөккө да буолуо быыкайкаан хамнастаах бибилэтиэкэҕэ үлэлии көспүт буолуохтаах дии саныыбын уонна бу истиҥ эйгэҕэ кэлэн, кырдьык даҕаны, аартыга арылыннаҕа!

Оҕо эйгэтигэр сылдьар киһи өрүү эдэрдии эрчимнээх диэн, аһаҕастык эттэххэ, ымсыыра көрөөччүбүн. Ол да иһин Наталья Скрябинаны бочуоттаах сынньалаҥҥа баран дьиэҕэ бүгэн олоруо диэн санаа суох. “Үһүс тыына” арыллыа, аартыга кэҥиэ диэн эрэллээхпин.

Оҕо, ыччат кутун туппут киһи, биһиги Натальябыт.

Бу киһи аайы бэриллибэт талаан. Тэрээһиҥҥэ Покровскай орто оскуолатын кырачааннара кэлэн учууталларыгар анаан ырыа ыллаан барбыттара да астыннарда. Наталья Филипповна бибилэтиэкэтигэр аҥардас кинигэжни эрэ пропагандалыырынан, оҕолору ааҕыыга уһуйуунан эрэ муҥурдамматаҕын билэбин. Үөрэнээччилэргэ Быраап Академиятын ытык киһибит Александр Ким-Кимэн көҕүлээһининэн отутунан сыл салайан кэлбитин билэбит. Ханна даҕаны маннык дьаһаныы суох этэ буолбаат. Кыра эрдэхтэн киһи быраабын, обществоҕа эбээһинэһин билии олоххо туохха тэҥнэһиэй… Наталья Филипповна урут уруккуттан ылсыбыт дьыалатын тиһэҕэр тириэрдэр, кыбыстыбат гына толорор үтүө үгэстээх. Бу отутунан сыл кини олус сэмэйдик тылыгар киллэрэн Покровскай оҕолоругар Быраап Академиятыгар улахан сололоохтору аҕалтаан лекция аахтарарын, көрсүһүүлэри тэрийэрин тыл эппит дьон сөҕө-махтайа кэпсээтилэр – араас өрөспүүбүлүкэ күн солото суох судьуйалара, борокуруордара, ис дьыала министиэристибэтиттэн, университеттан преподавателлэр кэлэн баралларын. Хас биирдии итинник дьону кытары көрсүһүү Сокуон диэни саҥа удумаҕалатан эрэр ыччаттарга өйдөрүгэр-санааларыгар хатанан хаалара саарбахтаммат, абыраммыт оҕолор диэ этим. Бу сыллар тухары элбэх оҕо бу сокуон уонна быраап эйгэтигэр үөрэххэ баран олоҕун суолун кэлин кэмсиммэт гына таба тайаннаҕа.

Натальябыт аны уонунан сылларга култуура идэлээх сойуустарын улууспутугар салайан кэлбитин бэлиэтиир тоҕоостоох. Бары актыбыыстара дьоро күнүн үллэстэ кэлбиттэр үөртэ – Андриан Егоров, бибилэтиэкэ эдэр үлэһиттэрэ ырыа бөҕөтүн ыллаатылар, биир-биэс харчы төлөбүрэ суох бииргэ түбүгүрбүт профсоюзпут кэмитиэтин чилиэннэрин үтүө тылларын, мүччүргэннээх түгэннэриттэн ахтыыларын истэн астынным — уус-уран самодеятельноска өрөспүүбүлүкэ күрэхтэригэр син барсар этибит эрээри, спорт өттүгэр хаҥаластар чиэһинэйбитинэн сиэттэрэн кэнники буолааччыбыт дэстилэр, атыттар курдук аатырбыт спортсменнары хамаандабытыгар «кыбытар” идэбит суох диэн буолла.

Уопсайынан, Наталья Филипповна туһунан киһи элбэх кэрэни ханыылыан сөп – талаана аҕыс кырыылаах, оһуору-мандары айартан үҥкүүгэ-күүлэйгэ тиийэ. Дьүөгэтэ Гера Шишигинаны кытары түгэн көһүннэр эрэ омук сирдэринэн билиилэрин-көрүүлэрин хаҥатына айаннаабыт буолалларын билэбин. Оннооҕор биирдэ Улла Йохансонтан учуонай биир дойдулаахпыт Гаврил Ксенофонтовпыт “Урааҥхай сахаларын” аҕалан түмэлбитигэр туттарбыттара баара дии. Яковлевтар дьиэ кэргэттэригэр Натальябыт бэһис кыыс кэриэтэ буоларын билэбин. Аҕалара биhиги кэллиэгэбит Афанасий Михайлович Яковлев аатынан суруналыыстарга улууспут дьаһалтатын бириэмийэтин туттарыыга өрүү баар буоларын сэргии, махтана көрөбүт. Улууспут бэлиэ тэрээһиннэрин, спорт, уус-уран самодеятельность, литература да буоллун тэрийсэ, түбүгүрэ сылдьарын уруккуттан билэбит. Ол курдук, хаҥаластарга умнуллубат 2000 сыллаахха Иккис спортивнай оонньуулары тэрийсибитин, Комсомолга үлэҕэ сылдьар бойобуой албан аат суолларынан өрөспүүбүлүкэтээҕи походтары, араас фестиваллары, “Ил хомус”, Эргиир үҥкүүтүн Уһук илиннээҕи уонна Сибиирдээҕи фестивалларын о.д.а. ыытыспытын умнубаппын. Өссө инбэлииттэр улуустааҕы уопсастыбаларын кытары бибилэтиэкэбит ыкса сибээстээхтик үлэлээн кэлбитин ахтан аһарыаҕыҥ эрэ. Татьяна Харлампьева барахсан баарыгар элбэх да тэрээһиннэри ыыталларын билэрим, өрүү алтыһар буоламмын – Татьяна муҥура суох махталлааҕа…

Тэрийэн дьоҕур баар киһитэ, комсомол кэминээҕи эрчиимин ыһыктыбакка тута сылдьар, барыбытыгар билигин даҕаны холобур буолар киһибит, СӨ култууратын туйгуна, “Гражданскай килбиэн” Бочуот бэлиэтин, ону сэргэ Саха сирэ Россия састаабыгар киирбитэ 375 сылынан дьоһунбэлиэлэр кавалердара, ЫБСЛК КК, өрөспүүбүлүкэ култуураҕа уонна духуобунай сайдыыга, Үөрэҕирии министиэристибэлэрин үрдүкү наҕараадаларынан бэлиэтэммит Наталья Филипповнабыт. Баҕарабыт салгыы инниҥ диэки баран иһэргэр, олохтон салгыбаккар, бар дьоҥҥун өрүү үөрдэ-көтүтэ сылдьаргар.

Людмила Аммосова.

Мои посты о Хангаласском улусе в 2025 году:

Провожая уходящий 2024 год…

Аварийная остановка котельной в селе Тит-Эбя: как это было и что необходимо предпринять

Драматург Степан Ефремов 120 сылын бэлиэтээһин түгэннэрэ

Юные исследователи из Хангаласского улуса успешно выступили на республиканской научной конференции «Шаг в будущее»

Поздравляем редакцию газеты «Хангалас» и победителей конкурса по подписке!

Династия Шишигиных — «Самая творческая династия» в республике!

Международный турнир по борьбе хапсагай «Хаҥалас хапсаҕайа». Торжественное открытие

Участники «Школы мэров» посетили Хангаласский улус!

Уйбаан Шамаев Саха тустуутун — Хаҥалас хапсаҕайын туһунан

Искренние соболезнования родным и близким…