Бүгүн 2023 с. балаҕан ыйын 20 күнүгэр Дьокуускай куоракка ийэ кынным Чердонова (Атласова) Варвара Семеновна чугас аймаҕын, эдьиийин Дьячковская Александра Петровнаны тиһэх айаныгар атаарыы буолан ааста…
Александра Петровна Дьячковская 1937 сыллаахха бэс ыйын 15 күнүгэр Уус-Маайа улууһун Күп нэһилиэгин Тумул бөһүөлэгэр колхозтаах Петр Саввич уонна Ликорья Васильевна дьиэ кэргэнигэр оһоҕос тугэҕинээҕи күүтүүлээх кыыс оҕонон күн сирин көрбутэ.
Александра Петровна 1956 сыллаахха Уус-Маайа орто оскуолатын бутэрэн Сталин аатынан колхозка үлэлии киирэр. Икки сыл үлэлээбитин кэннэ эппиэтинэстээх кыыһы бэлиэтии көрөннөр Тумулга маҥнайгы кулууп аһылларынан кулууп сэбиэдиссэйинэн аныыллар, сотору буолаат сана аһыллыбыт оҕо садыгар сэбидиссэйинэн көһөрөллөр. Ити сылларга Александра нэһилиэк ыччатын түмэр комсомол секретарынан талыллан үлэлиир. Онтон салгыы үүннэрэн 1961 сыллаахха советскай — партийнай оскуолаҕа Дьокуускайга үөрэттэрэ ыыталлар.
Партийнай оскуоланы ситиһиилээхтик кыһыл дипломунан бүтэрэн Александра Петровна дойдутугар төннөн кэлэн совхозка үлэлии сылдьан Иннокентий Иннокентьевич Мордовскойдуун ыал буолбуттара, Дьокуускай куоракка олохсуйан, үс уол оҕону төрөтөн, атахтарыгар туруоран 57 сыл бииргэ дьоһун олоҕу олорбуттара.
Дьокуускайга кэлэн Александра Петровна комсомол ОБКОМугар инструкторынан үлэлээбитэ, Саха Государственнай университетыгар история факультетыгар кэтэхтэн үөрэҕи бүтэрэн, устунан үлэлии хаалбыта. 1987 сылтан 2009 сылга диэри университетка кадрдары салайар отдел начальнигынан үтүө суобастаахтык үлэлээн дьон-сэргэ махталын ылбыта, үгүс наҕараадалардаах: Российскай Федерация Үөрэх Министерствотын Бочуоттаах грамоталара, Саха республикатааҕы Наука уонна үрдүк үөрэх государственнай комитетын Бочуотунай грамотата, Российскай Федерация үрдүк профессиональнай үөрэхтээһинин бочуоттаах үлэһитин знага, Үлэ бэтэрээнин, «Дети войны» мэтээллэринэн наҕараадаламмыта. Ону таһынан партия, комсомол, университет араас юбилейдарын бэлиэтээһиҥҥэ анаммыт бэлиэ грамоталара, махтал суруктара хара баһаам.
Александра Петровна үс бииргэ төрөөбут убайдара Аҕа дойду Улуу сэриитигэр утуу-субуу барбыттара, олортон Николай уонна Улахан Миитэрэй сэрии толоонуттан төннүбэтэхтэрэ. Убайдарын сырдык ааттарын уйэтитиигэ кини олустук сыраласпыта, сураҕа суох суппут Ньукулай көмүс уҥуобун булан, төрөппуттэрин иннигэр ытык иэһин толорбута.
Бу курдук биьиги ийэбит, эбээбит. эдьиийбит, чугас аймахпыт Александра Петровна Дьячковскайа сирдээҕи аналын толорон, салайар улэ, үөрэх, улахан дьиэ кэргэн түбүгүнэн, сиэннэриттэн дьоллонон, томточчу 86 сааһын туолан уһун ыарахан ыарыыттан бу сыл балаҕан ыйын 17 кунугэр биһиги кэккэбититтэн күрэннэ. Александра Петровна сырдык мөссүөнэ биһиги сурэхпитигэр куруук сырдык өйдөбул буолан хаалыа.
Биһиги дьиэ кэргэн аатыттан дириҥ кутурҕаммытын тиэрдэбит…
Александра Петровна, быдан дьылларга бырастыы, быраһаай…