Сунтаарга СӨ Бочуоттаах гражданина Климент Иванов кинигэтин сүрэхтэниитэ

Л. А. Попов аатынан оройуоннай бибилэтиэкэ сайтыттан информация, хаартыскалар уонна Ютуб ханаалым видеолара.

Судаарыстыбаннай уонна уопсастыбаннай диэйэтэл, СӨ норуотун хаһаайыстыбатын үтүөлээх үлэһитэ, СӨ Бочуоттаах гражданина Климент Егорович Иванов “Времен связующая нить = Кэм-кэрдии ситимэ” кинигэтэ сүрэхтэннэ
Биир дойдулаахпыт Климент Егорович Иванов, судаарыстыбаннай уонна уопсастыбаннай-политическай диэйэтэл, СӨ норуотун хаһаайыстыбатын үтүөлээх үлэһитэ, СӨ, Сунтаар, Абый, Үөһээ-Бүлүү, Өлүөхүмэ, Хаҥалас улуустарын Бочуоттаах гражданина, Саха АССР тэриллибитэ 100 сылыгар анаан, «Кэм кэрдии ситимэ»#»Времен связующая нить» диэн кинигэни таһааран, дьонугар-сэргэтигэр өссө биир дьоһуннаах бэлэҕи оҥордо. Бу кинигэни, бүгүн, муус устар 19 күнүгэр Кыыл Уола аатынан норуот айымньытын киинин конференц-саалатыгар Сунтаар улууһун салайааччылара, муниципальнай сулууспа бэтэрээннэрэ, эдэр ыччат уонна Климент Егорович үлэтин-хамнаһын сэргээччилэр толору мустан, үрдүк таһымнаахтык сүрэхтээтибит. Саҥа кинигэ автора Дьокуускай куораттан телемост нөҥүө киирэн, элбэх эҕэрдэ, махтал тыллары иһиттэ, биир дойдулаахтарыгар сүбэ-соргу биэрдэ. Кинини кытта сэргэ телемост нөҥүө «Арктик-Капитал» ХЭТ ген.директора Матвей Николаевич Евсеев, бастакы Президеммит көмөлөһөөччүтэ Сергей Валентинович Попов, Элгээйилэр уонна биирдиилээн дьон киирэн көрдүлэр, эҕэрдэлэрин, санааларын эттилэр.
Кинигэ сүрэхтэниитин Тойбохойтон К.С.Тихонова баянын көтөхпүтүнэн киирэн, музыкальнай эҕэрдэлэринэн сэргэхситтэ. Ол курдук, тэрээһини Л.Попов тылларыгар «Сунтаар миигин ыҥырар» ырыанан Н.Эконова, В.Коротов саҕалаатылар уонна Н. Михалева-Сайа тылларыгар «Алгыспын аныыбын» диэн улууспут официальнайа суох гимнинэн түмүктээтилэр. Быыһыгар Клара Степановна урукку сылларга уостан түспэккэ ылламмыт ырыалары талан, библиотека кыргыттара тылларын булан, бэчээттээн кэлбит дьон ыллаан эдэр саастарын санаан сүргэлэрэ көтөҕүлүннэ. Бу кинигэ аныгы кэм эдэр салайааччыларыгар, үүнэр көлүөнэҕэ остуол үрдүгэр уура сылдьан ааҕар кинигэлэрэ буоларыгар эрэнэбит. Ол курдук, Климент Егорович өр сылларга өрөспүүбүлүкэ сайдарын туһугар сыратын биэрэн туран үлэлээбит сылларын, алтыспыт дьоннорун туһунан суруйууларын киллэрбит. М.Е.Николаевтыын киэҥ далааһыннаах, дириҥ толкуйдаах үлэлэрин сырдатар. Автор ыччакка, эдэр салайааччыларга «Уруккуну билбэт киһи инникитэ суоҕун» өссө төгүл санатар.
Түмүккэ мустубут дьон кинигэ өссө элбэх ахсаанынан тахсарыгар, Климент Егоровичка уһун дьоллоох олоҕу баҕаран санааларын эттилэр.

Мария Иванова, Л. А. Попов аатынан оройуоннай бибилэтиэкэ сүрүннүүр библиограба