Дьэһиэй бөһүөлэгин төрүттэммитэ 395 үбүлүөйдээх сыла!

Дьэһиэй бөһүөлэгэ 395 сыллаах үбүлүөйүн көрсө Саха сириттэн Красноярскай кыраайга дэлэгээссийэ тиийдэ. Дьэһиэй олохтоохторо сахалыы үгэһи, сиэри-туому тутуһан, ыалдьыттары үөрүүлээх быһыыга-майгыга көрүстүлэр.

Хайдах көрсүбүттэрин туһунан аан дойду виртуоз хомусчута Варвара Степанова — Арчыына маннык диэн санаатын үллэстэр: «Дьэһиэй сахалара арыылаах алаадьынан күндүлээн, сахалыы айхаллыы көрүстүлэр. Түһүлгэҕэ киириигэ сир аһатар анал мөһөөччүктэри туттардылар, салгыы онон эбэни күндүлээн, сир дойду иччилэригэр махтанныбыт, айаммыт алгыстаах буоларыгар көрдөстүбүт».

Галина Ботулу

«Ыраах Саха сиригэр олорор урууларбытын көрсөн олус үөрдүбүт. Саха сириттэн ыалдьыттар кэлэллэрин өр кэтэспиппит. Маннык курдук, инникитин даҕаны өрүү бэйэбитин өйөһө-өйдөһө сылдьыаҕыҥ», — диэн Дьэһиэй бөһүөлэгин баһылыга Галина Ботулу баҕа санаатын эттэ.

Дьэһиэй сахалара төрөөбүт төрүт тылларын дириҥэтэн үөрэтэллэрин өрөспүүбүлүкэ өйүүрүгэр эрэллээхтэр. Билигин кинилэр сүрүн кыһалҕалара — төрүт түөлбэ тылын харыстааһын уонна үөрэтии.

Сахалыы сиэринэн ыһыах утаҕа – Кымыс. Дьэһиэй сахаларыгар СӨ «Саха сүөһүтэ» генофонда хааһына тэрилтэтэ Мэҥэдьэк кымыһын ыыппыта. (Санатан эттэххэ, Ньурба улууһун Маалыкай бөһүөлэгэр баар «Мэҥэдьэк» отделение бэс ыйыгар биэлэрин ыан кымыс оҥорор).

Дьэһиэй сахалара ынах, сылгы, таба ииппэттэр. Кинилэр сүрүн дьарыктара балыктааһын.

«Саха» НКИХ «Талбан» биэриитигэр: Дьэһиэй бөһүөлэгин төрүттэммитэ 395 үбүлүөйдээх сылыгар аналлаах биэрии (03.08.23)