ТААТТАЛАР ЭТИИЛЭРИН ӨЙҮӨҔҮН ! - Блог Николая Барамыгина

Чурапчыттан биллэр общественник Уйбаан Пономарев ватсабынан ыытта.

Сахалар сайдыыбытыгар кырата суох суолталаах 2 кылгас этии.

Быйыл улуу убайбыт Былатыан Ойуунускай 130 сылынан элбэх дьаһаллар ыытылыннылар. Олортон Платон Алексевич төрөөбүт, сэтинньи 11 күнүгэр «Олох үөһүгэр» диэн кини туһунан быһа биэриигэ Протодьяконов диэн Чөркөөх түмэлин үлэһитэ:

— Биһиги таатталар эһиилги 2024 сылы өрөспүүбүлүкэҕэ «Саха тылын» сылынан биллэрэргэ уонна Орджоникидзе болуоссатыгар Ойуунускай аатын иҥэриэҕин диэн туруорсабыт -диэбитин олус сөбүлүү иһиттим.

Кырдьык,саамай сөптөөх туруорсуу. Тыла суох-омук суох!
Сахабыт тылыгар син үлэ барар курдук эрээри,тылбыт мөлтүүр, кэхтэр куттала улаатан иһэр. Биир атын саҥалаах омугу көрбөтөх, тыа сирин уһук учаастактарыгар тиийэ кыра оҕолорбут нууччалыы тылланан барыылара элбээтэ. Киин куораппытыар сахалыы үөрэтэр оскуолалар букатын аҕыйахтара,тиийбэттэрэ,сахалыы кылаастаах оскуолаларга төрүт тылы үөрэтии аатыгар эрэ ыытыллара баар чахчы.

Онон кэлэр сылы «саха тылын»сылынан биллэрэн элбэх дьаһаллары ыыттар омукпут төрүт тыла сайдарыгар улахан туһалаах буолара саарбаҕа суох.

Аны Орджоникидзе болуосатын аатын уларытар уолдьаста. Урут-уруккуттан туруорсуу бөҕө барар.Серго Орджоникидзе Саха сиригэр аҕыйах кэмҥэ сыылкаҕа олорбут,сахалар тустарыгар элбэҕи оҥорбута биллибэт. Кини аатынан улахан, киин уулусса баар. Сөп буолуо.

Онтон ити болуоссат арҕаа өттүгэр Ойуунускайбыт улахан памятнига, соҕуруу өттүгэр кини аатынан баар суох сахабыт тыйаатыра, онтон болуосата — атын,туора киһи аатынан. Төрүт дьүөрэлэспэт.Дьокуускайбытыгар саатар саха биир улуу уолун аатынан болуосаттаах буоларбыт тоҕо табыллыбат? Болуоссат аатын уларытыы туох да мачайа суох. Онтон уулусса аатын уларытарга онно олорор бары ыаллар, дьоннор, тэрилтэлэр докумуоннара, пааспардарыгар аадырыстара барыта уларыйыан наада.
Онон Дьокуускай мээрийэтэ ( Е.Григорьев) болуоссат аатын уларытарыгар күүскэ туруорсуоҕун диэн ыҥырабын.

Түмүгэр бу суруйуубун аахпыттар сахабыт тыла эстимиэн, омукпут туһугар олоҕун толук уурбут, улуу киһибит Ойуунускай аатынан болуоссат баар буолуон баҕалаахтар бары, саатар биир эмэ группаҕа, туһааннаах дьоҥҥо тарҕатаргыт, санааҕытын суруйаргыт буоллар бу этиилэр олоххо киирэллэригэр олук буолуохтарын умнумаҥ!
Таатталар ыҥырыыларын өйүөҕүн!

Уйбаан Пономарев.
Чурапчы.

Миг Ютуб каналбар Ойуунускай туһунан: